一連三日嘅《施政報告》致謝議案踏入第二日啦，今次就唔見狂打鐘點人數，暫時都算叫做無驚無險啦！之不過，暴風雨前夕總係風平浪靜嘅……皆因除咗接住落嚟嘅「一地兩檢」無約束力議案之外，仲有修改《議事規則》呢個燙手山芋，照Jenny睇都應該繼續風波不斷、花生不停喇！

眾志內部爆醜聞，林淳軒出走。此情可待成追憶?(林淳軒facebook圖片)

林鄭坦白爭議多開局難

　　建制派一直想喺補選前修改立法會《議事規則》阻止拉布。連特首林鄭月娥接受港台節目訪問嗰陣都幫口，話立法會議事規則非常落後於形勢，如果要修改都係拎走同社會脫節嘅部分，令議會運作順暢啲，「不可能杜絕任何形式的拉布或延長討論」，強調修訂並唔係針對個別黨派，感覺唔應該有太大的爭拗云云。

　　不過林鄭都好坦白，直認自己開局非常艱難，要處理一地兩檢，又有立法會議員修改《議事規則》，佢形容呢啲議題本質上有爭議，「無論我有幾大誠意，伸出幾多橄欖枝都難以扭轉局面」。

阿涂嬲豬籲「放長雙眼」

　　點都好啦！你要修改《議事規則》泛民當然唔會肯過你啦！涂謹申（阿涂）就嬲嬲地咁同Jenny講，成個修改建議明顯針對民主派啦！例如提呈請書嘅議員人數，建議由20人加到30人，將會令到喺直選中獲過半數選民支持民主派，無法喺立法會成立委員會，調查涉及重大公眾利益嘅事件。

　　佢仲話林鄭作為特首，形容議事規則過時，仲同意建制派走去修改，心態上是想立法會變成全國人大，仲覺得林鄭唔應該為咗表現自己「好打得」，就犧牲「一國兩制」。所以叫市民未來幾個月「放長雙眼」，政府係唔係又會「乘人之危」撥開施政議程，畀修改《議事規則》打尖。

成立8人溝通小組真係Work

　　講到咁激動，咁又唔係完全冇計傾噃！事關民主派會議召集人莫乃光同法律界郭榮鏗，代表22名非建制派就去信建制派「班長」廖長江，指希望就修改《議事規則》上開會傾傾搵共識。郭榮鏗話初步對家反應都幾好，雙方已經同意成立8人溝通小組，當中泛民建制派各派4人，小組成員而家仲未有定案，但佢預計自己會有份參與。Jenny希望真係傾到成果出嚟，日日口水戰，真係你唔厭我都悶！

(林淳軒facebook圖片)

眾志內部爆醜聞 林淳軒退黨

　　呢邊廂，泛民同建制可能有偈傾；另一邊廂，泛民內部就暗湧處處。香港眾志今日就喺Facebook專頁發咗個聲明，宣布（前）成員林淳軒「違反黨內財政處理程序，經確認並無財政損失。經黨內調查後，裁定林淳軒違反黨員之行為操守，即時免去常委職務。林淳軒亦已提出退黨申請，獲得批准。由即日起林淳軒已非香港眾志成員，其未來對外的任何行為均與本組織無關。」呢個Post一出，Jenny、網民、仲有佢哋嘅支持都非常驚訝！紛紛大呼；「唔係吓話？！」

　　林淳軒就冇解釋咁多，只係喺自己facebook 話；「今天我離開香港眾志了。對於眾志，實在有太多的抱歉和感謝。不論如何，今天都是個新旅程的開始，繼續加油。」夠晒耐人尋味！話晒佢同黃之鋒無論喺學民思潮定係香港眾志時期，一直都係緊密戰友，今次話走就走？Jenny暫時未八到內幕，不過小妹就覺得，如果牽涉錢銀，始終人情還人情，數目要分明好啲！係咪先？