有「煲呔曾」之稱嘅前行政長官曾蔭權，佢嘅涉貪案都搞咗5年幾，最終「公職人員行為失當」罪成，但係「行政長官收受利益罪」呢條罪，陪審團就達成唔到有效裁決而兩度解散，律政司就話唔會申請重審（住），法官噚日就頒下判詞，入面除咗叫煲呔曾畀500萬訟費之外，仲有個重點令到大家有好大反應噃！

人生於世上有幾個知己……

　　是咁的，判詞就話，喺單案嘅第二次審訊尾段，煲呔曾啲前同事喺唔同日子，由公關公司或顧問帶入法庭坐在專用地區，法官直斥係「走後門」，覺得係有目的地影響陪審團，令佢哋覺得被告（煲呔曾）係好人，同埋有社會唔同光譜人士支持。

　　Jenny都記得，審訊時又真係「星光熠熠」，除咗才子陶傑，仲有前律政司司長黃仁龍同埋前財政司長曾俊華（鬍鬚曾）都有到場旁聽。

煲呔曾涉貪案搞咗5年幾，最終「公職人員行為失當」罪成，而家正保釋等候上訴。

黃仁龍特登發聲明：不符事實

　　法官呢篇判詞一出，矛頭似乎就篤中晒咁多位名人喇！所以今日黃仁龍都特登發聲明，話法官個批評係「不符事實」，澄清返兩次旁聽都係自發，係作為前同事和朋友嘅鼓勵同支持，唔係咩公關帶佢入去喎！

　　而鬍鬚曾亦都透過發言人話，出席聆訊純粹係出於對朋友嘅關心，仲甚有意味咁話，好高興見到社會上，仍然有人願意為遭遇困難嘅朋友伸出援手，大眾普遍都會認同呢種「普世價值」添！

　　公道啲講句，做得前特首嘅「前同事」，都真係幾難唔知名！嗱！下個月25、26號，高院上訴庭將會就煲呔「公職人員行為失當」嘅上訴作聆訊，小妹都幾好奇，到時唔知仲有冇咁多老友現身撐場呢？定最後係「友誼常在你我心裡」就算？

　　講開又講，煲呔曾做過嘅嘢，又係唔係值得咁多位名人現身「支持」？呢個又係另一個問題喇！讀者們，你哋覺得呢？