無驚無險又到Friday！Jenny今日就過咗個好Happy嘅Friday，皆因Jenny跟咗香港航空公司去機場睇佢哋最新喺法國運返嚟嘅A350客機，同埋體驗佢哋嘅貴賓室！大家知啦貴賓室唔係係人都入得架嘛！今日Jenny就受香港航空嘅朋友仔邀請，唔使信用卡、唔使買貴飛就可以入去感受一下，做返日VIP，筍呀呢！

呢架就係香港航空首架A350客機喇!

有新飛機用，緊要賀一賀佢!

萬四呎貴賓室　頭等區有獨立房

　　港航呢個貴賓室叫「遨堂」係位於中場客運廊，佔地差唔多萬四呎，成個Design係出自本地設計師Phill Cheng之手。港航嘅服務總監簡浩然(Stanley)同Jenny講，貴賓室入邊嘅尊尚旅客區今日係第一日開，淨係俾傳媒同埋嘉賓參觀先，聽日先係正式開放，而另一邊嘅商務旅客區就已經開咗一段時間。

　　由於地方太大，靚靚空姐就帶Jenny入去行個轉先，一入到去接待處就有香港夜景做背景，左手邊係畀頭等客嘅尊尚旅客區;右手邊係畀商務客嘅商務旅客區！Jenny梗係先去參觀最威威嘅尊尚旅客區先啦！一入到去就聽到陣陣鳥語，係爭僅啲花香，但係勝在夠寧靜、夠Grand！想叫嘢食用iPad落單就得，等一陣就會有專人送到面前。

　　行勻兩個區域，設計概念雖然一樣，但特色各有不同，尊尚旅客區就行區綠色森林風，著重私隱，有獨立貴賓室、獨立洗手間！而商務旅行區就行較為relax草園feel，開揚熱鬧啲。Stanley仲同大家講，佢哋設計呢個貴賓室嘅概念係香港特色、舒服、多功能同埋希望畀到客人家的感覺。

　　尊尚旅客區入面兩個獨立貴賓室可謂完全係為日理萬機嘅貴客而設，獨立房間入面有電視有梳化，如果同生意伙伴一齊，直頭開埋個會、簽埋張約先上機都冇問題，完全唔駛怕畀路人甲乙丙行過昅到。

商務旅行區就行較為relax草園feel，開揚熱鬧啲。

地道雞蛋仔任點任叫　期間限定芫茜味

　　而商務旅客區同其他lounge比較似，有一條20米長嘅美食廊，有香港地道美食、甜品、焗飯等等，最特別係會長期供應即叫即整嘅雞蛋仔！今個月嘅特別口味版仲係唔少人鍾意嘅芫茜味！Jenny試食過後覺得不過不失啦，如果芫茜味再重啲就好喇！仲見一個個精緻嘅Cupcake，以香港「茶記」為主題，細問之下原來係為今日嘅開幕做準備架！Jenny梗係唔蝕底攞返個嚟食下先啦！

如果芫茜味再重啲就好喇！

呢杯特飲叫Hong Kong Sky係由菠蘿同椰子打成，幾好飲架!

　　商務旅客區呢邊除咗有嘢食，仲有6至8個3D影院同埋休息室，客人可以喺度舒舒服服咁睇電影、瞓吓覺。但咁咪好易Miss左班機囉?隨行的PR都笑咗，話「咁就唯有自己set鬧鐘喇！」不過最令Jenny覺得貼心嘅係，休息區入面有個育嬰房，可以畀媽媽餵母乳，仲有電動BB搖籃，等BB食飽飽就乖乖瞓覺覺，上機就唔會喊到嘈住人啦！你知啦，長途機有BB喊，真係會令人崩潰架！

育嬰房可以畀媽媽餵母乳，仲有電動BB搖籃，

Simon愛寧靜　JackSo話打風當練習

　　參觀完貴賓室，終於到重頭戲，去睇A350客機啦！一入到去真係覺得架機幾闊落，牛高馬大嘅男人都唔使驚撞親個頭。Jenny見紅色櫈嘅設計就同港航其他機一樣，織布質地，上面有一個個圓型嘅「福」字暗花，好有中國特色，外國人應該好Buy，可惜Jenny就唔太識欣賞。

民航處處長李天柱(右一)和機場管理局主席蘇澤光(左一)齊齊等睇A350首航水禮。

　　民航處處長李天柱(Simon)都大讚架機好靜，佢同Jenny講飛機靚同定非常重要，仲話覺得啲櫈嘅質料好、間隔又好闊落，總之就咩都好滿意啦，最like就係佢昂藏六尺坐落經濟客位都唔覺逼狹！仲話自己身為民航處處長，當時幾時都會支持本地嘅航空公司，以後去外國開會都會考慮多啲坐香港航空嘅機！

　　近來接連有颱風襲港，今個星期六、日可能又打風喇！機場管理局主席蘇澤光(JackSo)今日就藉著參觀新飛機呢個機會，特別感謝在機場工作的所有員工，大讚佢地狂風中都緊守崗位，確保機場運作如常，向世人展示香港嘅軟實力;仲話「相信再來一個颱風，都可以當成一個新嘅練習，更加會做得好」。他仲提到，希望機場第三條跑道建成之後，會為本港航空業帶來更多發展空間，保持香港作為國際航空樞紐的優勢。