9月，相信唔少同學仔都開咗學，不過有啲本來打算今個月去英國升學嘅同學就唔好彩喇，因為原來唔知點解英國嗰邊個簽證遲遲都未批，有好多學生都趕唔切開學，有啲仲要延後一年入學，甚至被取消學籍添！可想而知一班學生同家長而家有幾徬徨，所謂時間就是金錢，Jenny聽到都戥佢地慘啊！

學生Visa出唔切，好多學生都趕唔切開學!

有書讀非必然

　　其實以往有唔少學生哥一到9月都話唔想開學，但係有書讀真係唔係必然㗎！有班去英國留學同學就想開都冇得開，都咪話唔慘慘豬。如果下年先開得學，英國脫歐搞掂晒之後，英鎊好大機會升返，到時家長荷包就唔荒唔「扁塌塌」！

　　大家都知，英國一直都係香港人嘅留學熱點，以往都冇乜點聽過因簽證問題而出事，但係就喺9月1日開學之際，教育界立法會議員葉建源就同Jenny講，已經收到幾個相關嘅求助個案，而且愈嚟愈多，仲發現今次嘅簽證大塞車原來唔只香港出事，連印度嗰邊都有類似情況，雖然未可以肯定係唔係跨地區事件，但都算係幾嚴重。佢仲同Jenny透露，由9月1日開學到依家已經接收到過800宗個案(Oh!My God!)其中喺初期，個案未係好多嘅時候，佢哋辦事處就已轉介咗28個個案去領事館，而家有25單處理咗，但係仲有唔少學生今個星期就要開學，所以佢都要求英國方面快啲處理好相關個案。

7月申請至今仍未有證

　　或者有啲人會話，其實啲學生早啲申請咪冇事囉！嗱！說話就唔可以咁講喇，事關根據簽證中心嘅服務承諾，一般簽證需時約15個工作天，而俗稱「快證」嘅優先審批申請就最快可以3日搞掂，最慢都係一個星期內，但係就要額外收多大約2000大元。所以有邊個諗到而家開埋學都搞唔掂吖！

　　葉議員就同Jenny講，最離譜嘅Case係，有同學仔喺7月尾就申請一般簽證，但到而家都未收到消息；亦都有學生喺上個月10號就已經申請快證，但係到今日都仲未批，錯過咗月尾嘅開學禮之餘，校方仲通知佢唔可以入讀今個學年，要延遲一年先可以入學，呢下真係唔知點好喇！

政府開熱線幫學生

　　政府今次就真係「急市民所急」喇！特首林鄭話好關注今次呢件事，所以今日就開設咗條24小時嘅熱線同電郵畀仲未拎到簽證嘅同學仔同家長提供協助，熱線31422522就啱啱今日3點開始運作;如果用電郵，就可以先喺政府網頁www.gov.hk下載登記表格，填好之後send去ukstudentvisa@1823.gov.hk做登記，政府就會將收集到嘅個案，轉介去英國駐港總領事館跟進㗎啦。

　　林鄭仲話，領事先生願意幫手寫信向學校或機構解釋返係簽證問題，唔關學生事喎！希望呢件事可以快啲告一段落，同學仔都可以係新學年順利開學，讀好書喇！