被譽為「建制派重炮手」嘅地產界立法會議員石禮謙，上星期接受一間媒體訪問嘅時候，放出一個深水炸彈畀林鄭，可以話徹底咁反轉建制派過去一直以來扮演嘅角色，將政府施政彈到體無完膚，更批評林鄭喺今次反修例活動演變而成嘅動亂「斷錯症」，絕對係令政壇震咗一震。

　　Tina分別向建制派不同持份者打聽今次阿石呢枚震撼彈，點解發得咁應。有熟悉經民聯嘅建制派中人就透露，阿石對林鄭上場之後多次針對地產界嘅施政已經非常不滿，肚入面早就有一團火，特別係空置稅一役，阿石對林鄭更加係面和心不和；最近施政報告大幅擴闊九成按揭嘅借款上限，更加係要二手樓明搶新樓嘅生意，對發展商算係幾不利，「呢啲時候唔發火點同選民交待？」

　　市面有消息流傳，就話阿石鬧林鄭係因為阿爺開咗綠燈，等一眾議員透過「鬧」，消一消部分支持建制派、但又唔鍾意林鄭選民嘅一口氣。另一位直選建制議員就話，阿石既然唔係直選，下一屆仲選唔選都係未知之數，加上經民聯得一個立法會議席係要靠直選，估計呢個並唔係主因。不過建制之中的確喺早排已經有共識，為咗嚟緊區選（唔知選唔選到）同出年立法會選舉「盡人事」，鬧林鄭、鬧現屆政府施政失誤絕對係上策。呢位建制人仲話：「民調有82%人反對佢做特首，斷估香港無82%黃絲卦？保守估計建制支持者之中起碼都有近半係非常不滿林鄭，鬧林鄭對建制派選情，絕對係良藥。」

　　不過鬧還鬧，要好似阿石「有色之士」（有膽色）鬧得咁狠嘅，亦都無乜幾多人，所以絕大部分都退而求其次，執住政府施政嘅問題大鬧特鬧，就好似剛剛立法會討論上年公布嘅稅務寬免方案，唔少建制派就狂鬧政府派錢不如李嘉誠云云，目的都係一樣：「鬧林鄭、保選戰」。