當我們被四方八面而來的浮誇、偽術圍剿時，貼地的回應，無疑是一股清流。

　　當然，也可以是策略性的。

　　先講講突然成為紅人的未來美國第一夫人Melania，她先後以輕描淡寫的方式回應了一些連公關老手都覺得棘手的問題。

　　話說競選到了埋身肉搏時段，突然殺出特朗普的性騷擾聲帶，引起軒然大波，簡直羣情洶湧，共和黨多人立刻與特朗普割席，連副總統後選人的夫人也斥責這鹹豬手。

　　傳媒訪問亞特太，佢就答：我已經鬧咗佢㗎咧，佢認咗錯。其實選總統，係揀領袖……

　　選舉塵埃落定之後，有人問佢特朗普把口唔收，你有冇勸吓佢呢？佢就淡淡地回應；我都有話佢㗎，不過佢有時聽，有時唔聽。

　　真係神來之筆，並非亂嗡！既切合老婆身份，沒有希拉莉凌駕丈夫的霸氣，又同意輿論的指摘、卸咗啲道德攻勢力先，同時又暗示，老公有性格，仍然我行我素，真性情喔！

　　至於前第一夫人兼白宮夢碎的希拉里，自從大熱倒灶之後，開始接吓地氣。落敗不久，傳出她行山的照片，素顏微笑，同粉絲Selfie。如此名符其實的腳踏實地，淡化了她那勇悍的精英形象。

　　敗選後首次出席公開活動時，她坦然承認自己心灰意冷，極為失望。跟住講：過去一周，有時我只想攞本書攬隻狗，蜷喺被竇抖一抖唔想出門口。

　　非常人性化，脫離戰鬥格。

　　形象這回事，要拿捏得張弛有道，有時竟是純用師奶邏輯，就已可四両撥千斤！唔使扮堅強、唔駛扮高貴。貼地自然，贏在眼前！