空間這東西，有點虛無，卻很重要。

自由的空間

　　「醫生，我老公瞓覺成日講嘢，可以畀啲乜嘢藥佢食呀？」

　　「唔使食藥，畀啲機會佢日頭講嘢就得咧。」

打機的空間

　　遺囑揭曉時刻。年青的寡婦問：

　　「有幾多現金、幾多層樓？」

　　「冇噃。」律師答，然後補充說：

　　「你先生話，生前只見你日打機、夜打機，因此為你做咗個特別嘅安排。佢生前已經搵人，喺佢死後，為你嘅帳戶買齊你最鐘情嗰個遊戲嘅昂貴武器，你可以無限沉溺、橫掃天下咧。相信咁對你而言，比乜都重要，佢祝你得償宿願、獨霸武林。」

　　「哼！佢以為咁樣可以懲罰我？以我嘅身手，不難再擸多百幾萬蚊嘅架胜，跟住去創業。死老鬼！睇死我吖，我一定發畀佢睇！」

秘密的空間

　　「老公，你睇過最令你傷心嘅book係乜呀？」

　　「就係你成日想睇嗰本囉！」

　　「係！我咁有文化？」

　　「就係我嘅bank book囉。 」

膨脹的空間

　　「老公，我哋嘅身材，因為日日食外賣，又冇運動，而家好似吹脹咗咁，點算呀？」

　　「冇乜點算，我最相信順其自然、無為而治。你呢，雖然大腿肌肉鬆弛，好在，個肚腩如果再食大啲鬆啲，就可以遮住對腳。」

　　「啋！咁醜怪，我地一齊去減肥囉！」

　　「唔好！如果我運動，我會太性感，你危險㗎！」

壓縮的空間

　　一大伙人在討論甚麼是最適宜結婚的年齡。

　　有人提議：

　　「女嘅55、男嘅60。因為兩人一結婚，都有退休金，財政獨立，冇金錢糾紛。大家又唔使返工，可以朝朝暮暮。而且唔使生仔、睇功課，少好多拗撬。一結婚就可以執子之手、與子偕老，完美！」

　　兩性關係的空間，千古以來，都難以拿揑。關鍵是：態度不要太認真、心要真！