《魚缸博客》歐洲人究竟係唔開冷氣，定無得開冷氣？

　　《魚缸博客》博客最近留意到「歐洲熱死人」呢單新聞，據報道指係因為歐洲係「厄爾尼諾」年下，溫度屢創新高，分分鐘熱過香港；有網友戲稱：「唔知送林超英過去歐洲，佢仲可唔可以堅持到唔開冷氣？」

　　事實上，究竟歐洲人究竟係唔開冷氣，定無得開冷氣？呢個問題真係好哲學。博客有朋友移民去去歐洲，佢話一般平民百姓根本買唔起冷氣，因為一部分體式冷氣基本上都要兩千到三千歐元，安裝費同機價分分鐘一樣，計返港紙，即係大約40000蚊，比起香港係貴三四倍（唔計你搭棚）。

　　另一方面，係歐洲裝冷氣真係煩過梵蒂岡。首先歐洲好多屋，特別係市中心入面，係存在大量歷史建築，係歷史建築安裝冷氣，係受建築保護法規管；如果係好似公寓住戶一棟十幾層咁，你又要等業主立案法團開會批准。

　　你以為咁就完？然後你就要走去當地市政府申請改造許可，確認管線不會破壞建築結構與市容，即係咩喉管如果係外露、冷氣機滴水處理唔到，咁就BYEBYE先；好啦，當你申請曬所有批准，就要搵師傅做，由於歐洲本身過往唔流行冷氣，所以識做冷氣工程嘅師傅少之又少，你又要排隊啦，快則三個禮拜，慢則兩個月，到時秋天都到了，可以飲熱奶茶了。

　　你聽到咁煩，係咪都唔想搞？

　　不過中國係冷氣方面，雖然後來者，但作為「世界工廠」，出口冷氣方面梗係平靚正。你見大陸有好多分體式都唔同款，例如係直立式冷氣機，就好適合外國人啦，如果住HOUSING，基本上部室外機直接整個架放係外面，拉條線入屋，釘都唔使打，直接插電直接用；如果你住APARTMENT，佢有隻「U字形掛窗式冷氣」，好似掛衫咁掛係個窗台，關窗、開冷氣、DONE。

　　聽聞呢隻U型冷氣係美的出品，博客上亞馬遜睇，都係四五千蚊港紙，即係500幾歐左右，未必話一定全屋好凍，但夜晚瞓覺可以頂得下熱已經好好。

　　所以你話，呢個世界邊有永遠嘅敵人，如果今時今日歐美仲同中國打貿易戰，真係費鬼事彩你；作為中國人嘅博客表示：我冷氣較低一兩度，再睇下歐洲熱浪要維持幾耐先算。

《編者按》本欄搜羅即市傳聞，惟消息未經證實，《經濟通》亦不保證內容之準確性。