現在除了抗疫、還要抗抑鬱、抗恐慌，所以最好笑一笑。

情人節

　　浪漫的氛圍，花香襯酒香，二人沐浴之後寛衣。

　　「老婆，你卸咗妝，令我想起萬聖節。」

　　「老公，你除咗褲，令我想起兒童節。」

　　本來是情人節，變了潑（冷）水節。

 ***   ***   ***

　　「你都無心肝嘅，有無準備情人節禮物呢？」女的詐嬌。

　　「最實際、最合適合時合用，有錢難求嘅－口罩一盒。」

　　「唔使咧，我用你嘅咪得囉。」

　　「小姐，公司裁員，三個人嘅工作我一個人食晒，忙到九彩，無時間諗呀！」

　　「我畀啲hints你吖，我睇中一條鑽石金鍊，襯晚裝好靚。」

　　「而家手緊，又唔知幾時無咗份工，你調低吓要求啦。」

　　「好吖，咁要一條Tiffany銀鍊啦。」

　　「你好品味，不過可唔可以講心唔講金呢？」

　　「哼！送一百朵玫瑰去我公司得咧啩，講心都要講面㗎。」

　　「我可以一次過滿足你三個要求－送你金銀花！」

　　結果情人節變了光棍節。

盂蘭節

　　農曆七月十四。酒樓外燒著衣紙。

　　一面容憔悴男子走進來。

　　「先生，幾位？」

　　「兩位。」

　　男子點了三菜一湯，一面吃一面對著空氣說話。

　　老闆開始心裏發毛。

　　男子對著面前空位說：「嗱！老婆你慢慢食，我出去入咪表，好快番嚟。」

　　直到關門，還沒有那人的踪影。

　　盂蘭節變了愚人節。

觀音借庫

　　阿婆興高采烈借完錢，大搖大擺地走出廟宇，廟祝急急攔住。

　　「你未添香油噃！」

　　「借錢梗會還，咪畀錢中介！」她理直氣壯地說。

　　「借錢慢慢還，先捐畀神壇。」廟祝都唔小嘢。

　　鐵咀雞對壘，變了鬥雞節！