《魚缸博客》日產本田強強聯手，中國車企要當心？

　　今日博客覺得最大新聞，就係本田和日產汽車公司將宣布正式啟動經營合併磋商，所謂強強聯手，唔通未來真係見到「紅H GTR」？

　　事實上佢地聯手唔係無原因，因為內地本田嘅「飛度」（香港人叫JAZZ或者FIT），價格一減再減，銷量一差再差，再加上剛剛內地出左新規，OBD有故障碼都唔俾你過年檢，其實真係打死汽油車，所以佢地終於意識油車已經到「此誠危急存亡之秋也」。

　　咁點解又要搵日產合併呢？其實日產係云云車企之中，電動車算係做得最好果一個，甚至比起雙田更加出色。雖則話日本境內做得最好，但對比起BYD、理想呢類電車大佬，目前依然都未追到水平；所以兩間車企整合資源，拎出最高水平整電車，捲土重來「反攻」可能性好大。

　　咁係咪代表內地企業可以忽視兩大日企合併呢？非也，日本人最強嘅並非技術，而係品牌效應以及質量。內地車企整嘅車，好多用家反饋就係「玩幾年就要換」、「玩具車咁」，而日本人一係唔做，一做就做到最好個隻，如果整架電車可以玩十年而維持高質量，真係會對內地車企造成威脅。更何況三菱都考慮緊加入，雖然三菱一早退出內地汽車市場，但人地係機械上依然有技術人才，所以如果三巨頭組合變成「大惡魔」，大陸車企真係要當心。

　　博客認為，其實目前內地車企面對消費轉型，係汽車銷售上依然遇到瓶頸，如果呢個大惡魔聯盟真係組成，又真係可以出到高水準電車，個危脅甚至可能比起T車更大；換個角度，同佢地有關企業又可以炒一轉，大家可以留意一下！

《編者按》本欄搜羅即市傳聞，惟消息未經證實，《經濟通》亦不保證內容之準確性。