《經濟不停學》國泰11供7好弔詭，咩係「質數供股法」？

　　今日國泰航空(00293)宣布400億重組方案，其中包括以每11股供7股嘅供股計劃，令到投資者譁然。究竟供股係要點供，而「質數供股法」係咩呢？去文！

（Shutterstock圖片）

供股要有「權」，唔想供可以賣走

　　咩係供股呢？簡單嚟講，就係公司等錢使，公司問現有股東科水。畀完錢，公司就畀多份「新股份」你。股東可以按自身情況，決定是否供股。如果覺得唔啱心水，供股個「權」可以係公開市場賣走，但要視乎個「權」性質畀唔畀賣。

（Shutterstock圖片）

　　股東供股，要按照公司定出嘅比例，即每持有幾多股，可以認購幾多股新股。一般嚟講，供股有分大比例同小比例。大比例如1供5、1供10，即每手持1股就可以畀錢供多5股、10股，小比例如3供1、2供1等。換言之，供股計劃之後，總發行股數就會多咗，你要供股先可以維持自己嘅投票權同收息比例；假如唔供，你嘅投票權就會被攤薄，牙力就會少咗啦！

供定唔供？要視乎公司前景

　　好多人對於供股有疑惑，究竟供好唔供好。其實供唔供，好大程度要似乎公司前景，如果公司業務有增長，拎供股嘅錢係做投資業務，咁老虎蟹都供落去啦！例如2009年匯控(00005)進行世紀供股，以12供5方式，每股28銀進行供股，而當年如果肯供嘅人，之後有機會發過豬頭啦，因為之後股價起飛到6、70蚊，簡直就係執平貨。

（Shutterstock圖片）

　　不過供股過去嘅印象都好負面，因為唔少「妖股」利用供股方式向小股東「抽水」，更甚是先供完股抽水之後，再合股向下炒，令到小股民慘慘豬。不過近年來證監會強力打擊呢種炒賣行為，所以先供後合呢種情況好少見！

咩係「質數供股法」？碎股點算好？

　　國泰呢次採用11供7比例，行內叫做「質數供股法」。質數大家細個一定學過啦！就係1、3、5、7、11呢類除唔盡嘅數，當年匯控採用12供5方式，以1手400股計算，即需要手持12手，即4800股，或其倍數先會無碎股出現，變相令小股東要買齊4800股，要用更多錢供股，咁對股價就有推動作用。

　　而兩個質數嘅供股就更絕啦！好似呢次國泰11供7，原則上你必須買夠11手或其倍數先唔會有碎股出現，但國泰今次唔配發零碎供股股份，亦唔接受任何碎股供股申請，即係意味「一手黨」係無得供股，要最起碼手持兩手，先供到1272股，叫做湊夠一手供股；最理想供股方法係手持8手，就供到5090股，整數為5000股，平均後為7.34元。

　　而如果持碎股放賣，都需要減啲啲先有「收買佬」肯收；而如果唔供，自己嘅投票權就會「被稀釋」。所以真係供又唔係，唔供又唔係囉！

撰文：李皆穎

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【說說心理話】認真地是旦、是旦地認真！精神科專科醫生許龍杰：一包薯片救宇宙？！要學會於物理上及心理上為自己建立一個「護城河」► 即睇