《小傳日記》商湯發布新ＡＩ！可控式圖生片有幾咁新派？

　　《小傳日記》孖屐引頸以待嘅世界人工智能大會（ＷＡＩＣ）今日終於喺上海揭幕，事前已
經有一堆ＡＩ概念股炒起，其中商湯（０００２０）噚日偷步勁升一成七之後，今日喺大會上就
發布新產品Ｖｉｍｉ，係一款可控式嘅人物影片生成大模型。
　　近期有碌開Ｒｅｅｌｓ都會碌到，多咗一種由靜態圖片ＡＩ生成嘅短片，於是近期就有好多
人用呢款ＡＩ將一啲經典ｍｅｍｅｓ圖生成影片，廣大網友對於睇咗咁多年嘅靜態ｍｅｍｅｓ圖
竟然變成識郁，都感覺非常新奇有趣，因為竟然睇到ｍｅｍｅｓ圖嘅後續故事，但因為無得控制
ＡＩ生成啲乜，擺幅圖入去生成就好容易出到奇怪又好笑嘅後續出嚟。
　　而商湯Ｖｉｍｉ其實都係圖生片嘅ＡＩ，不過最大唔同就係「可控」，呢點令到Ｖｉｍｉ喺
ＷＡＩＣ上面獲選為大會最高榮譽嘅「鎮館之寶」稱號。據商湯介紹，Ｖｉｍｉ可以精準咁控制
人物表情，更加可以控制半身姿勢動作變化，再ＡＩ生成出同人物相符嘅頭髮、服飾同背景，光
影方面都可以流暢自然咁生成。據講Ｖｉｍｉ比起同類產品有更高嘅穩定性，最多可以生成出一
分鐘嘅短片，唔會因為短片變長而減低像真度。商湯提到Ｖｉｍｉ已經可以準備開放畀大眾使用
，尤其針對客群係內容創作者，可以用幾張相嚟生成風格多變嘅短片，又或者生成之後再用嚟剪
輯作其他創作。
　　今次呢個發布好就好在並唔止於概念，而係可以馬上推出應用，商業化潛力有幾高好快就知
曉。但如同前人美圖（０１３５７）一樣，面向大眾嘅生成式ＡＩ好容易過氣，美圖當日推出過
由真人相生成人像畫ＡＩ曾經掀起熱潮，但曇花一現到而家已經無乜人玩。點樣可以延長技術生
命周期，同脫離「試玩」，都係好多ＡＩ公司要解決嘅難題，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。