《魚缸博客》機械人概念火熱！上海電氣再飆升，炒到幾時先識停？

　　上海電氣(02727)自21號公布注入母企機械人業務以來，熱度持續火熱！首日（21號）股價飆升兩成，今日盤中再衝17%，最高達2.81銀，創下自2021年5月以來的新高。咁機械人概念股會火到幾時呢？一齊睇下！
　　21號，上海電氣宣布以約30.8億人仔從控股股東電氣控股手中收購發那科機器人50%股權的寧笙實業100%股權。寧笙實業係工業機械人業務嘅持股平台，擁有發那科機器人50%股權及發那科國貿25%股權。
　　上海電氣話，收購發那科機器人50%股權係個戰略性決策，將會為公司帶來先進技術和豐富產品，包括260多種機械人及周邊產品，同時涵蓋智能製造解決方案和全生命周期管理服務。呢次收購唔單止提升咗公司技術實力，仲強化咗其喺自動化和智能製造領域嘅競爭優勢。
　　此外，上海電氣亦將把目光投向特種機械人和智能機械人，打造「三駕馬車」協同發展嘅產業格局。呢種多元化業務布局有助於分散市場風險，提高集團整體盈利潛力。副總裁贾廷纲提到，工業機械人和人形機械人喺供應鏈和製造環節上有高度相關性，未來將進一步完善人形機械人產業鏈。
　　從供應鏈上睇，上海電氣已經擁有生產工業機械人高級軸承、精密減速器及其他核心零部件嘅能力。呢啲實力為公司喺高端機械人市場嘅布局打下咗堅實基礎。
　　博客認為，喺當前自動化及智能製造成為全球熱點嘅背景下，機械人概念無疑係一個吸引眼球嘅投資主題。從技術圖表上睇，可能喺3銀左右見到小小阻力，呢個水平係2021年初「頭肩頂」嘅「頸線」，亦係整數關口嘅心理挑戰。

《編者按》本欄搜羅即市傳聞，惟消息未經證實，《經濟通》亦不保證內容之準確性。