《魚缸博客》友寶在線限售股解禁市值即時攔腰斬，點解差成咁？

　　四年一度嘅美國總統選舉進入最後肉搏戰，由特朗普對戰賀錦麗，最終鹿死誰手將於本周揭曉。除了美國大選之外，美聯儲亦將議息，加上人大常委會第十二次會議今日開始一連四日喺北京舉行，市場預期內地財政增量刺激政策細節有望喺今次會議推出，重磅事件陸續有嚟，所以一眾大孖沙唔敢輕舉妄動，搞到個市悶悶地。恒指暫時窄幅上落，高低波幅只得百幾點。
　　不過，悶市中經常出現奇葩，今日最奇當屬友寶在線(02429)，股價今早插水一半，暫時成為最大跌幅股票。集團上周五（1日）公布，有6511萬股非上市股份完成轉換，喺11月1日於聯交所上市。另外，上市前股東及一眾IPO基石投資者今日起限售股解禁，涉及近7.7億股。
　　友寶在線係內地自動售貨機經營商。自動售貨機包括即選即取貨櫃、飲料售貨機、飲料及零食售貨機等。2023年招股時吸引奈雪的茶(02105)及商湯(00020)附屬成為基石投資者。
　　友寶在線上市價10.35銀，並喺舊年11月3號掛牌上市。首掛當日，股價高收41%，報14.58銀，市值即刻升上炒上過百億銀。股價喺之後大半年雖有上落，但變化不大，到今年6月12日收市13.82銀，同首掛當日收市價相差不大。不過，6月中連炒幾日後，股價喺6月20日最高升至上市新高嘅29.4銀。短短6個交易日，股價升超過1.1倍。不過同樣係6月20日，股價創完新高後，當日即刻插水，收市倒跌三成。無獨有偶，股價連跌六個交易日之後，到6月27日跌返去13.94銀，即係同6月12日暴升前差唔多。
　　博客有個習慣，買入一隻股票前，一定會望下業績。而友寶在線嘅業績，其實無嘢值得期待。首先營收方面，除咗2021年錄得按年升四成之外，隨後幾年乏善可陳，2022年營收按年跌近6%。2023年營收都只係追貼2021年水平，即係兩年來無乜進步過。今年上半年都只係個位數增長。至於盈利方面更加無眼睇，2021年至2023年間，集團分別蝕1.85億銀、2.85億銀同3.27億銀，愈蝕愈入肉，試問咁嘅業績點炒得上百億市值？所以，呢種股票長揸真係要諗清諗楚，短炒就要記得跑得快，切忌太貪，否則隨時變咗而家當造嘅大閘蟹。

《編者按》本欄搜羅即市傳聞，惟消息未經證實，《經濟通》亦不保證內容之準確性。